خرافه: شي بي شي 

تلاقى شي بي شي هوا والصيادة قاللهم :ان شاء الله ما تحصلوا شي ، عطوه طريحة وقالوله معاش تقول هكى؟ قاللهم امالا شني انقول ؟

قالوله قول :ستةوسبعة فى النهار شوية.

عدا لقي وحدين رافعين واحد ميت بيدفنوه قاللهم ان شاء الله ستة وسبعة في النهار شوية ، عطوه طريحة قاللهم امالا شني انقول ؟

قالوله قول: عظم الله اجركم في الميت اللي رافعينه.

عدا لقي وحدين رافعين عروس والتريس يغنوا والنساوين يزغرتن قاللهم عظم الله اجركم في الميت اللي رافعينه ، عطوه طريحة قاللهم امالا شني انقول ؟

قالوله قول: مبروكة سعيدة علي هلها

عدا لقي وحدين عندهم كلبة ناتشة ولدهم والدم يبخ قاللهم ان شاء الله مبروكة سعيدة علي هلها، عطوه طريحة قاللهم امالا شني انقول ؟

قالوله قول: تنبح وتلالي في الديار الخوالي

عدا لقي واحد شاري بقرة خاش بيها علي عويلته وفرحانين بيها ويصبولها في الحليب علي وجهها قاللهم ان شاء الله تنبح وتلالي في الديار الخوالي ، عطوه طريحة قاللهم امالا شني انقول ؟

قالولا قول: زبادة لبادة علي شواربه وشوارب اولاده

عدا لقي وحدين يطلعوا في خزان مجاري _حشاكم _ قاللهم ان شاء الله زبادة لبادة علي شواربه وشوارب اولاده ، عطوه طريحة قاللهم امالا شني انقول ؟

قالوله قول: ييبس ويشيح وتقله الريح

عدا لقي وحدين يغرسوا في جنان شجر اشكال الوان وزرع وخضرة وفرحانين بيه وكيف باديين قاللهم ان شاء الله ييبس ويشيح وتقله الريح ، عطوه طريحة قاللهم امالا شني انقول ؟

قالولا قول يكبر ويقنصل ويولي كيف العنصل

عدا لقي واحد داقاته شوكة في رجله قال له ان شاء الله تكبر وتقنصل وتولي كيف العنصل دعس عليه بيضربه المرة هدي{ شي بي شي }هرب والراجل هضاك قعد يفزع في ناسه قعدوا حتى هما يجروا وراء شي بي شي لكن شي بي شي واخد عليهم السبقه 

لين واحد يحرث علي جمل والحراث هضاك يحرث في وطا مش ليه شي بي شي قال له جوك هل الوطا يا حراث الحراث خاف عدا يجري وشي بي شي مسك مقبض المحراث وبدا يحرث فاتوا الجماعة ورا الحراث شدوه وبدوا فيه ضرب يحسابوه شي بي شي وهو يتفرج عليهم ويضحك

وجيت منهم وخليتهم وبودني سمعتهم وبعيني ما ريتهم.

الطفل مهند الوافى 

الاطفال وطلاق الامهات 

والشاعر هنا يصف معاناة طفل نتيجة طلاق والديه ووقوعه تحت قسوة زوجة ابيه وهى ماساة واقعية تتكرر فصولها نتيجة حالات الطلاق او وفات احد الوالدين والضحية هما الاطفال الابرياء

***************************************************************
كلمات المجرودة
بسم الله بسم الله  ***  نبى نقول كلام البادى
ع اللى صايرلى بالله  ***  قصة على عمرى والله
نحكيها للمستمعين
نستأذن ليكم نحكيها  ***  أول ما نبدا باديها
وتصنت شنو باديها  ***  وانا عمرى سبعة سنين
نحكيها ليكم الحكاية  ***  وقت الى ربتنى جداى
وتعانى فى عمرى أنايا  ***  مانشبح فى بويا وين؟
جداى هى ربتنى بارك فيها هى حضتنتنى ** وقت العازة ماخلتنى وتراعى فيا بالعين
وتراعى ديما غير بيا  ***  حتى وين نغيب شويا
تبدا ديما أدور فيا  ****  وتقوللهم ولدي وين؟
هذا من بوى خلانى ***  ونعيش بروحى وحدانى
مانشبح فى أمى وخوالى ***  من صغرى عايش مسكين
من صغرى عايش فى الهم  ***  وحرمونى من شبح ألام
وبويا أتزوج وحدة سم  ***  وعشت معاها العمر حزين
عشت مع أمى الجديدة  ***  حالى كل يوم بتعقيدة
ياسعود اللى مع أمه وسيدة  ***  عاش حياتة مع الوالدين
مش كيف اللى زى انى  ***  أيامى سود مع دادية
فى الدنيا ماشفت هنايا  ***  بويا مع خوتى الاخرين
اللى تقولة هى يلبيها  ***  مايقدرش يفنص فيها
حتى بالدوة يناغى فيها  ***  ويواطى معاها فى العين
ونقول الاتضرب فيا  ***  وجهى مخبش منها هى
وفى الحوش الاتندّه فيا  ***  نغسل رانى فى لماعين
نغسل ونكنس فى الصالة  ***  والكوجينة والغسالة
يابوى رانى فى حالة  ***  نرقد جيعان مسيكين
نرقد يابوى جيعان  ***  دادية ما فيها حنان
رانى يا بوى تعبان  ***  نأخذ طول اليوم حزين
تاركنى فى الحوش انضم  ***  انت يابوى ماتعلم
أنت يابوى مش مهتم  ***  أنت يا بوى موش حنون
تاركنى نغسل ونسيق  ***  ونكنس فى الحوش أنسيق
يابوى دادية تشيب  ***  نبى نمشى لأمى وين؟
ما أحلى العيشة مع الام  ***  اللى تجلى ع القلب الهم
موش كيف الدادة اللى سم  ***  وقلب الام صحيح حنون
يابوىنبى الميمة  ***  نبى نعيش معاها ديما
من غيرها مالى قيمة  ***  اللى منها نلقى الحنين
اللى منها نلقى الحنان  ***  ومانصقع نرقد دفيان
نصيحة منى للاخوان  ***  ماتفرق أم من واشين
راعى واشينك وارعاهم  ***  وفى كل لحظه ماتنساهم
كيف تبدا الميمة معاهم  ***  وهم بحداكم ملتمين
يا محلى لمة هالعيلة  ***  اللى مطلق مرته نحكيلة
شوف ولدك شن جاريلة  ***  وانشد لمجرب مسكين
وانشد اللى مجرب وانشد  ***  اللى زى هك ديما منكّد
ونحكيلك رانى من جد  ***  ماديرش راك مرتين


يابوى خليك معاى راهو همـــــــــــــــــى من دادية

تفسير القرآن الكريم

 فقط ضع الماوس على الآية  وستجد التفسير

اضغط هنا 

موهبه ليبيه كرويه 

عبدو كيخيا 

شجاعه بنت ليبيه 

ماشاء الله ......... علم و شجاعه و ثقافه 

  ... مواهب ليبيه 

منوعات طفل ليبي 

محمد ياسر

تعالى يا بونا 

ديدش حب الرمان

انا الطفل الليبي 

حمد وحمد وحمد

(الله ينعل الشيطان..فيه هذاك الراجل عنده ثلات أولاد..مسميهم (حمد

كل واحد منهم اسمه ( حمد) ..مرض الراجل ..طال مرضه..وينما أشرف ع الموت كلمهم وقال لهم

اسمعو وصيتي لكم ..حمد يارث ..وحمد يارث....وحمد ما يارث)..وقضى ومات

كل واحد قال نا نارث..واللي ما يارث هو أنت.

اختلفوا..وقالو نمشو للقاضي..وهم ما شين لقيوا جرة ناقة ..واحد قال :ها الناقة عورا...

واحد قال:ها الناقة عرجا

واحد قال: ها الناقة بترا

وصلو لنجع القاضي ..لقيو عنده عزومة ..ذابح حولي..القاضي راجل كريم ..

" بيته ديمه عامر بالخطار

في راجل ينشد على ناقة..قال لهم :صادفتكم شي ناقة.

قال له حمد الكبير: ناقتك عورا مع اليمين..

طار الراجل وقال: أيوه هى ناقتي..

وقال حمد الوسطي : ناقتك عرجاء مع اليسار..

قال الراجل أيوه هى ناقتي..

وقال حمد الصغير: ناقتك بترا..

قال الراجل أيوه هى ناقتي.. وين لقيتوها

قالوا : ما رينا لا ناقة ولا جمل

قال الراجل : لا..ناقتي عندكم..حلفوا ما نظروها..

قال القاضي لصاحب الناقة:صحيح ناقتك عورا وعرجا وبترا؟

قال الراجل : صحيح

التفت القاضي وقال : كيف عرفتوا أوصاف الناقة من غير ما تنظروها؟!

قال حمد الكبير: الناقة تاكل في العشب مع القرب الايسر..وعرفت انها عورة من اليمين...

وقال حمد الوسطي : الناقة توطا بثقلها ع الكراع اليمين .. عرفت انها عرجا مع اليسار..

قال حمد الصغير: بعر الناقة كوم واحد لو كان فيها ذيل طرطش البعر.. تعجب القاضي والناس من فطانة الضنا..

فضت هذيك العزومة وكل واحد مشي في حاله..

قالوا الضنا:ياسيدي القاضي نحنا تاعبين لك من غادي..عندنا مشكلة نريدوك تحلها لنا..

قال القاضي: الليلة ما فيه الا الصلاة على النبي وبكرة الصباح رباح..

لمباكر في الضحاه .. 

قال حمد الكبير للقاضي : اللي طابخة الطعام البارح مش طاهرة

وقال حمد الوسطي : الشاه اللي كليناها البارح فيها سر كلب..

وقال حمد الصغير: ما تواخدني يا سيدي القاضي أنت فيك سر يهودي ..

قال القاضي : امهلوني للعشية..

مشي نشد الولية اللي طبخت الطعام 

قالت : صحيح مش طاهرة..

نشد راعي الغنم قال : صحيح الحولي ماتت امه جاع تالاه كلبه رضع منها..

نشد امه قالت: وانت صغير رضعاتك جارتي اليهودية مرة والا مرتين...

في العشية

قال القاضي : الكلام اللي قلتوه كله طلع صحيح لكن كيف عرفتوا؟..

قال حمد الكبير: الطعام مالح الولية اللي مش طاهرة ما تستطعمش الملح كل ما تذوق تلقاه باسل تزيد الملح..

قال حمد الوسطي : شحم الشاه المفروض يكون بينه وبين العظم هبر والشحم البارح فوق العظم كي شحم الكلاب...

التفت القاضي لحمد الصغير وقال له:باهي انت كيف عرفت انه في سر يهودي؟

قال: عزومتك البارح سمحة ما خصصت لا خير لكن فراشنا عطيب صقعنا واليهود وكالهم سمح وفراشهم بالهون والنصارى وكالهم بالهون وفراشهم سمح والناس يقولوا: كل مع اليهود وارقد مع النصارى..

بعد الغدا 

قال القاضي : ايش مشكلتكم؟

قالوا اسمنا واحد .. اسمنا حمد .. وبونا _الله يرحمه_وهو على فراش الموت قال :

حمد يارت .. وحمد يارت..وحمد ما يارت..اختلفنا ..ما عرفنا من اللي ما يارت..

قال القاضي : ساهلة .. عدو تريحو في هذاك البيت ..واللي نذز عليه يجيني وحده..

دز القاضي على حمد الكبير ..جاه .. 

قال له : بوكم قليل الرحمة .. ما يريد لكم الخير .. مات وسيب لكم مشكلة.. لكن ان كان تريد تارت عدي جيب لي قطعة من كفن ابوك ..

قال الولد : والله ما نقدر يا سيدي القاضي نحل قبر بوي وندس حرمته..

دز القاضي على حمد الوسطي ..جاه ..

قال له : بوكم قليل الرحمة .. ما يريد لكم الخير .. مات وسيب لكم مشكلة.. لكن ان كان تريد تارت عدي جيب لي قطعة من كفن ابوك ..

قال الولد : والله ما نقدر يا سيدي القاضي نحل قبر بوي وندس حرمته..

دز القاضي على حمد الصغير ..جاه .. 

قال له : بوكم قليل الرحمة .. ما يريد لكم الخير .. مات وسيب لكم مشكلة.. لكن ان كان تريد تارت عدي جيب لي قطعة من كفن ابوك ..

قال : القطعة تريدها صغيرة والا كبيرة ؟ والا نجيب الكفن كله..!

قال القاضي: هذا حمد هو اللي ما يارت .. غضيب شامس .. غضيب رب وعرب.. بوكم كان راجل عاقل .. الله يرحمه ويخفف عنه التراب الثقيل..

نشيد بصوت طفل ليبي 

عريفتي

The Story of 

The Last Prophet